O conselleiro de Cultura, Educación e Universidade, Román Rodríguez, e o alcalde de Lalín, José Crespo, estiveron presentes nos ensaios previos do Xacobeo Clarinet Fest 2021, celebrados este venres, e que a partir do sábado, e durante unha semana reunirá nesta localidade a recoñecidos músicos de diferentes nacionalidades, prestixiosos directores de orquestra e pianistas. Na visita tamén estiveron presentes a concelleira de Cultura, Begoña Branco, e Xocas Meijide, en representación da organización do festival.
O representante da Xunta destacou a importancia do encontro nun momento no que se está recuperando a actividade neste sector. Rodríguez fixo un chamamento a gozar do evento, respectando as medidas de seguridade. Tamén felicitou aos directores por elixir Lalín.
O Festival e Academia Internacional de Clarinete de Galicia, que impulsa o Concello co apoio da Xunta, está dirixido por David Fiúza e Xocas Meijide e inclúe concertos, exposicións, conferencias e clases maxistrais.
