Ruta do Umia será unha nova senda fluvial do municipio de Caldas de Reis, unha vez que este proxecto de dinamización sexa executado. Trátase dun percorrido lineal, co punto de partida na Praza do Camiño, onde será instalado un panel informativo cos datos técnicos e as recomendacións para a práctica de actividade saudable do paseo.
O itinerario continuará seguindo a canle do río cara á leira da Tafona e As Corticeiras, cun percorrido de 6,6 quilómetros de lonxitude (ida e volta), sinalizado mediante frechas direccionais e de seguimento. O final da ruta estará situado en Ponte Currucho, onde conectará coa Vía Verde, cuxa construción está nos seus inicios e seguirá o antigo trazado da vía do ferrocarril entre Portas e Vilagarcía.
É neste punto onde está prevista a instalación doutro panel informativo e a construción dunha pequena zona recreativa de descanso. A Ruta do Umia non presenta desniveis significativos, será accesible, e terá como visión predominante en todo momento a paisaxe do río.
Esta nova senda, ademais de converterse nun percorrido saudable, está concibida polo Goberno local como unha peza clave no mapa dun plan estratéxico de rutas saudables, porque que enlazará con outras (unhas son realidade e outra están en fase de elaboración ou de proxecto) proxectadas, como son as do Auga, a Vía Verde e Camiña Caldas, que discorrerá polo centro urbano.
O Concello de Caldas de Reis está integrado na Rede Española de Cidades Saudables, na área de Desenvolvemento Sostible da Federación Española de Municipios e Provincias, que financia este tipo de proxectos .
