Aínda que o salmón e os habitantes de A Estrada teñen vínculos desde moito tempo atrás, foi en 1974 cando se pon en valor este produto cunha festa a terceira semana de maio e o domingo como día grande da mesma, debido á degustación popular que permite a veciños e visitantes gozar das propostas culinarias que ofrece a hostalería local.
Este evento gastronómico, que une a tradición e a historia, está arroupado por diferentes actos culturais e sociais ao longo dos días de festexo, deixando claro que na Estrada, municipio de gran traxectoria festiva e de longa oferta cultural, o salmón segue reinando nunha gastronomía onde se atopa gran competencia pola enorme calidade dos seus produtos autóctonos.
A pandemia volverá condicionar as celebracións. O ano pasado coincidiu en plena corentena, coa poboación encerrada nos seus domicilios, mentres que nesta ocasión chega xusto cando as medidas restritivas relaxáronse ata un punto que non coñeceramos nestes últimos 13 meses. Aínda é pronto para recuperar a normalidade anterior, pero polo menos están previstos certos actos culturais coas necesarias medidas de seguridade e tamén a degustación de tapas en 20 establecementos co salmón como produto protagonista. Desenvolverase o sábado e o domingo en horario de mañá e noite, cun prezo de 2 euros por unidade.
Ademais, Adriana Abelleiro repite unha idea que xa puxo en práctica en 2020 e cun magnífico resultado que lle permitiu vender 1.200 petiscos. Naquela ocasión fíxoo xunto á Panadería A Fogaza. Este ano será unha opción que ofrece só o seu negocio, o Restaurante Sala Gradín. Trátase de catro barquetas de degustación que poden adquirirse a 6 euros cada par e recollerse no local tras encargo (teléfono 610432514).
A bandexa Río Ulla está composta por un saquito de salmón con froitos vermellos e salsa de mostaza e mel, e por unha ensalada de salmón con mazá confeitada e queixo de cabra á prancha. A bandexa Coto de Ximonde ofrece cilindros de salmón, espinacas e pasta, ademais de lasaña de salmón con bechamel branca.
ESPECIE EN PERIGO. A situación do salmón en Galicia é delicada, cun preocupante descenso na súa poboación durante os últimos anos. Furtivismo, contaminación, encoros e destrución do hábitat son algunhas das causas da súa diminución. Pero tamén a falta de caudal e a ausencia de repoboación, que levou aos pescadores a reclamar un maior compromiso por parte das autoridades galegas competentes.
Estamos ante unha das especies que necesita a maior calidade ambiental do medio no que vive, por iso é polo que a súa presenza estable en bo número nun río é un síntoma do perfecto estado de conservación global da conca.
O salmón atlántico é un peixe migrador anádromo que nace e pasa a primeira fase da súa vida nos ríos. Logo viaxa ao mar onde desenvolve a súa existencia para finalmente regresar ao río, probablemente o da súa orixe, para dar vida a futuras xeracións e pór punto e final á súa.
