Ás 11.17 horas do mércores recibiuse un fax na Casa Consistorial de Caldas de Reis no que a Consellería de Sanidade anunciaba á Administración local a súa decisión de prohibir o baño no río Umia ao seu paso por esta localidade. A Brigada de Obras encargouse de colocar os carteis facendo constar a súa determinación, e fíxoo en tres lugares: a fervenza de Segade, onde foron fixados dúas, Os Choróns e O Malecón.
O alcalde, Juan Manuel Rey, expuxo que a comunicación non precisa ningún dato para xustificar a medida, que xa fora adoptada o día 28 en Lantaño (Portas) á altura da praia fluvial.
A situación do Umia foi abordada nunha Xunta de Portavoces celebrada o mércores, que por acordo dos seus representantes transformarase nun Gabinete de Crise cuxo obxectivo será realizar un seguimento da canle fluvial e que se reunirá con periodicidade semanal. Outra determinación que tomaron foi enviar un escrito á Valedora do Pobo solicitando amparo.
O alcalde centrou as súas críticas na Xunta e dixo que o seu deixamento está a levar ao río a unha situación que cualificou de "desastrosa". Aos problemas de anos anteriores, provocados polo crecemento da maleza, súmase agora a especial incidencia da toxina que xera a microcistina, apuntou. "Debería darlle vergoña", agregou o rexedor, referíndose á Administración autonómica.
Manuel Cortés, do PP, recoñeceu que a orixe dos problemas está no encoro da Baxe, e mantivo que é necesario "tomar medidas" para que non suceda o mesmo todos os veráns.
Fernando Pérez, de ICdR, subliñou que o nivel da presenza de toxinas é moi elevado, o que obriga a aplicar un método de depuración específica da auga, que supón un desembolso económico superior ao que realizan outros concellos.
Manuel Fariña, do BNG, cualifica de "esperpéntica" a colocación duns carteis nos que non figura a Administración que ordena a prohibición, e insta ao Concello a publicar un bando explicando a situación aos veciños.
