Que o pasado ten presente, e tamén futuro, é unha afirmación que corroboran as numerosas festas cuxo eixo central son os oficios, as vestimentas e as actividades que noutro tempo foron habituais e hoxe son rescatadas do baúl dos recordos por quen as organizan. En Caldas de Reis calou a iniciativa posta en marcha hai seis anos, e este domingo celébrase a sétima edición da Feira Tradicional, que tivo como anticipo a xornada do sábado, na que os nenos foron os protagonistas.
O Xardín Botánico e o Paseo Román López son os escenarios e o programa está previsto que se abra ás 10.00 horas coa apertura do recinto. Durante a mañá actuarán o coro e as pandereteiras da Asociación de Xubilados e Pensionistas Caldenses, os bufóns e trobadores, Dávos Porfía o Grupo de Danzas e Gaitas de Caldas. Ademais, haberá unha ruta de cabalos e carruaxes. Ás 12.00 horas poderá saborearse gratuitamente carne de caza no posto do Concello, e a comida está anunciada ás 14.30. Ovos con pan de millo, churrasco con patacas fritas, roscón, pan, bebida e café compoñen o menú, cuxo prezo é doce euros.
Fanfarria Furruxa encargarase dos pasacalles na sobremesa, para dar paso aos cantares de cego, a cargo de Viravolta Monicreques. A Banda de Música Municipal de Caldas de Reis e a Banda de gaitas de Forcarei protagonizarán un concerto nas Palmeiras, ás 19.00, titulado Xolda na eira, e a música seguirá coa actuación do grupo folk Tanto nos Ten, que dará paso ao concerto protagonizado por Roi Casal. O músico e compositor catoirés ofrecerá un espectáculo cuxo eixo central será Cuba e o escritor Xosé Neira Vilas, titulado Son galego, Son cubano.
Paralelamente, Braulio Mondragón mostrará unha exposición de flores silvestres, haberá postos de venda de libros, non faltarán á cita os caricaturistas e, como é habitual, celebrarase unha concentración de vehículos de época.
