O Concello de Silleda, a través do departamento municipal de Medio Ambiente, que dirixe Klaus Brey, porá en marcha nas próximas semanas un programa de compostaxe doméstica. Esta iniciativa, que recibiu o visto e prace do Ministerio para a Transición Ecolóxica, a través do Plan Estatal Marco de Xestión de Residuos (Pemar), materializarase na contorna rural, concretamente nas parroquias de Ansemil-Martixe, Breixa e Carboeiro, coa participación estimada dun centenar de vivendas.
O alcalde, Manuel Cuiña, xunto co concelleiro de Medio Ambiente, Klaus Brey, e a edil Mónica González, mantiveron o luns un encontro con representantes dos colectivos veciñais para presentarlle a proposta. "Será un proxecto piloto que iniciaremos xa en xaneiro e co que teremos resultados para poder ampliar ao resto do municipio", explicou Cuiña.
O Concello de Silleda recibiu unha subvención de 13.280 euros -que corresponde ao 80% do total do proxecto, que conta cun investimento de 20.086 euros- a través do programa Pemar para pór en práctica a compostaxe nunha contorna rural.
Segundo indicou o Goberno municipal, este programa sumarase á campaña de información e sensibilización sobre os beneficios da compostaxe en materia orgánica que se estivo realizando no municipio nos últimos anos con iniciativas como o Plan Revitaliza da Deputación de Pontevedra ou a iniciada en 2015 coa repartición de composteros individuais a través de Sogama.
O Goberno municipal adiantou que nos próximos días os veciños e veciñas destas tres parroquias recibirán información para sumarse ao programa e tamén se desenvolverá unha xornada formativa na que o persoal técnico que supervisará o proxecto explicará como se debe facer correctamente o compost.
Tras a sesión formativa, procederase á repartición dos composteros, nos que o Concello silledense estima que se poderán valorizar ao redor de 54.750 quilos anuais de residuos.
