O municipio de Vila de Cruces pechou o programa do seu XXVI Festa Gastronómica do Galo de Curral, que celebrará o seu día grande o domingo 9 de xuño, unha data este ano máis tardía do habitual para evitar a coincidencia da cita co período electoral. Nesta ocasión amplíanse a tres as xornadas festivas, que terán como artistas destacados ao humorista galego Roberto Vilar e á cantante cacereña Soraya Arnelas.
As orquestras París de Noia e Panorama actuarán na noite do venres 7 para ir abrindo boca. O sábado, a música continuará da man de Mekanika Rolling Band, a partir das 20.30 horas. Xa o domingo, uns pasacalles do grupo de gaitas O Arco de Merza e de Vai-Nela de Salgueiros abrirá os actos. ás 12.00 horas, os asistentes poderán gozar do espectáculo de humor "Saaabor!", con Félix Rodríguez e Fran Rei, de Culturactiva. Unha hora máis tarde está prevista a actuación da coñecida cantante Soraya Arnelas. Tras ela, subirá ao escenario o presentador Roberto Vilar, que será o encargado de ofrecer o pregón ao redor das 14.00 horas. A esa hora xa estará aberta a degustación do "galo de curral".
Pola tarde, desde as 17.30 horas, tocarán a Unión Musical Ponteledesma, a Unión Musical de Meaño e a Artística de Merza.
