Terra Termarum é o gañador do segundo Concurso de Decoración e Iluminación de Nadal, posto en marcha polo Concello de Cuntis co obxectivo de involucrar aos establecementos do municipio na ornamentación dunhas festas marcadas pola situación sanitaria provocada pola covid-19 e, paralelamente, animar o ambiente e as compras no comercio de proximidade. Son 200 euros os que lle corresponde.
O segundo premio (150 euros) foi para Gloss Moda, mentres que o terceiro, dotado con 100, corresponde ao Salón de Peiteado Lourdes. Bottino&Tacco gañou o cuarto e Calzados Mapi, o quinto, e ambos recibiron 50.
O xurado estivo formado por Cruz Sande Silva e Concepción Velasco Aedo (ambas as decoradoras de interiores) e María Isabel Eiras Miguéns (publicista). As tres son veciñas de Cuntis. O acto de entrega de premios contou coa presenza da tenente de alcalde Conchi Campos.
A concelleira aproveitou a ocasión para destacar a boa acollida desta iniciativa do Concello, que se reflectiu nunha alta participación no certame, así como tamén o gran nivel de todos os establecementos que concorreron. Campos agradeceu o esforzo que realizaron, adornando e iluminando os seus escaparates e as zonas exteriores con motivos do Nadal, de acordo ao establecido nas bases do concurso.
Conchi Campos deulles o parabén, en especial aos representantes dos cinco establecementos premiados, e tamén agradeceu o labor realizado polo conxunto do comercio cuntiense para ambientar as xornadas dos festexos e animar, deste xeito, a actividade económica e social do municipio.