O delegado territorial da Xunta en Pontevedra, José Manuel Cores Tourís, mantivo este luns unha reunión co comité de urxencia de Caldas para tranquilizar aos veciños e políticos con respecto á presenza da microalga cianobacteria no río Umia e no encoro.
Na reunión, Cores Tourís estivo acompañado da xefa territorial de Sanidade, Ángeles Feijoo-Montenegro, así como do xefe territorial de Medio Ambiente, José Manuel González.
Por parte do concello de Caldas, ademais do alcalde, Juan Manuel Rey, tamén estiveron presentes o vogal do PP, Manuel Cortés, o portavoz socialista, Manuel González, o de ICDR, Fernando Pérez e o do BNG, Manuel Fariña.
Os representantes da Xunta transmitiron unha mensaxe de tranquilidade tanto para os membros do comité como para os veciños do municipio, xa que segundo os controis que se realizan periodicamente no río Umia non hai presenza de toxina.
"No río Umia, Sanidade non detectou toxina microcistina, producida por algunhas cianobacterias, tamén coñecidas como microalgas verdes-azuladas", explicou Cores Tourís, quen si confirmou a existencia desa alga no río e no encoro, aínda que se atopa por baixo dos niveis preventivos da OMS.
"Non existe problema algún para o uso e para o consumo da auga nos concellos de Caldas, Portas, Vilagarcía de Arousa e no resto de concellos da Mancomunidade do Salnés. O comité é consciente diso, polo que lle rogamos que teñan moito coidado con alarmar a sociedade sen necesidade", sinalou.
En relación ao baño no río Cores Tourís recordou que ata chegar á cifra de 20.000 células non é necesario avisar da prohibición para o baño. "Aínda así, recomendámoslle ao concello de Caldas que puxese un cartel que recomendase non bañarse no río. O alcalde puxo un cartel dicindo que estaba prohibido o baño, cando non era necesario prohibilo; só era necesario non recomendar o baño, porque os niveis non chegaban ao que marca a lei sanitaria", explicou.
Durante a reunión, falouse especialmente dos traballos de limpeza do río. O delegado da Xunta trasladoulle ao alcalde de Caldas que non hai problema en volver levar a cabo traballos de limpeza. Aínda así, recordoulle a Juan Manuel Rey que Augas de Galicia xa lle dixo ao concello que ten que actuar no tramo urbano do río. Neste sentido, Cores Tourís explicou que o Goberno galego está disposta a chegar a acordos de colaboración con este fin, pero sempre acorde aos informes técnicos e sempre aplicando métodos manuais.
O mércores celebrarase outra reunión na Delegación Territorial da Xunta cos concellos de Cuntis e Moraña para analizar a situación.
DEFENDER AOS VECIÑOS. Pola súa banda, Rey asegurou que "sempre defenderá a saúde dos seus veciños" e que urxirá aos organismos pertinentes para que se eliminen as especies invasoras do río.
No transcurso da reunión, o comité solicitou un encontro urxente con Augas de Galicia, que Corés Tourís confirmou que se realizaría proximamente para dar solucións sobre a presenza desta alga.
Os membros do comité de urxencias de Caldas néganse a compartir o acougo que pide Cores Tourís. Manuel Fariña, portavoz municipal do BNG, asegura que "nos negamos a quitarlle a importancia que realmente ten este asunto e a ver o noso río tinguido de verde un ano tras outro. Queremos recuperar o Umia".
O alcalde de Caldas asegura que se non se ofrecen solucións para os pobos da conca do Umia recorrerán á Valedora do Pobo.
