O Tribunal Superior de Xustiza de Galicia (TSXG) ratificou a sentenza a favor dos vixiantes da Fundación Semana Verde de Silleda e condena a Alcor Seguridade á readmisión ou indemnización dos traballadores, ademais do abono de costas, ao considerar que foron despedimentos improcedentes.
A empresa recorrera o primeiro fallo favorable aos traballadores do xulgado número 4 de Pontevedra ante o TSXG, que deu de novo a razón aos afectados polos incumprimentos desta empresa, "que estivo amparada en todo momento pola dirección da Fundación Semana Verde para cometelos", segundo denuncia Iván Blanco, secretario de Organización de FTSP-USO.
Desde o sindicato anuncian que continuarán as súas "accións contra estas empresas 'pirata' do sector da seguridade privada e contra os clientes privados e administracións que contraten os seus servizos 'low cost' en detrimento de os dereitos dos traballadores".
