Vinte e dúas augardentes, brancas, tostadas e de herbas, presentáronse ao Concurso da Caña do País, unha iniciativa que se enmarca na programación da Festa da Anguía e Mostra da Caña do País, cuxo día grande se celebra este sábado. O certame conta con 700 euros en premios.
Son oito as brancas, o mesmo número de herbas e seis as torradas. A precata celebrouse na Casa Consistorial e os encargados de realizar a valoración foron Juan Carlos García Busto, Serafín Novo López, Manuel Blanco Picón e Antonio Castaño García, catro persoas relacionadas co mundo dos produtos de destilados.
O xurado realizou unha selección de licores, eliminando os seis que obtiveron a valoración máis baixa. Os 16 augardentes restantes participarán na cata final, na que se decidirá a identidade dos gañadores nas tres modalidades. O produtor da mellor caña branca será gratificado con 300 euros, mentres que os primeiros premios dos licores de herbas e de torrada ascenderán a 200 euros. Os segundos clasificados recibirán un trofeo e un diploma conmemorativo.
A identidade dos galardoados será desvelada este sábado, na vixésima oitava edición da Festa da Anguía e Mostra da Caña do País. Os actos comezarán ás 17.30 horas con actividades para os nenos. Ás 19.30 será a quenda dos encargados de realizar unha demostración de destilado.
Toño Fraga lerá o pregón (21.30 horas) e, acto seguido, farase entrega dos premios dos concursos. A Banda de Música de Valga ofrecerá un concerto antes da degustación da anguía, que os asistentes poderán degustar a prezos populares, do mesmo xeito que cócteles elaborados con caña do país. Merche e a orquestra Charleston Big Band encargaranse do apartado musical.