"Sempre falando desa puta". Esta frase, escoitada en numerosas ocasións en Valga referíndose a Carolina Otero, foi pronunciada onte na presentación do Refaixo de Carolina, un colectivo creado para dar cabida a todos os grupos e veciños do municipio que abanderan a loita polo feminismo. A vida da Bela Otero e a prostitución son dous temas que serán abordados na primeira edición dos Encontros, que se celebrarán os días 23 e 30, e terán continuidade o día 1 de decembro.
Unha feminista cunha ampla traxectoria, iniciada no franquismo, a santiaguesa Nanina Santos, e unha activista que representa á xeración máis nova de mulleres que loitan pola mesma causa, a vilagarciá Daisy Alcalde, protagonizarán un coloquio sobre o controvertido tema da prostitución, o día 23, no Auditorio Municipal, ás 19.30 horas.
Unha visita guiada ao Museo da Historia de Valga é o primeiro acto previsto para o día 30, ao que seguirá a intervención de Javier Carballo, que exporá un avance do libro que está a escribir sobre Carolina Otero e será publicado na primavera do ano 2019.
Belén Senín, unha moza de 18 anos da localidade, recibirá o premio instituido polo Refaixo de Carolina, logo de gañar o Concurso de Poesía Varela Jácome, en Mondoñedo, cun poemario titulado A culpa. A xornada finalizará coa proxección dunha curtametraxe.
A Galería de Estudos do Baixo Ulla, veciños do municipio e a asociación cultural Os Penoucos promoven a iniciativa, e este último colectivo é o organizador do Carolina Son, un festival de música que se celebrará o día 1 de decembro no Auditorio. Os protagonistas deste evento serán Helen & Shanna e Lois.
