Valga conmemora o próximo 1 de xuño o 210 aniversario da batalla de Casaldeirigo rememorando a contenda da Guerra da Independencia que se librou no lugar en 1809. A recreación da batalla, que enfrontou os veciños da zona co exército de Napoleón, reunirá na contorna da Capela da Saúde uns douscentos figurantes que revivirán "a cruenta pero desigual loita na que as alarmas locais demostraron a súa ousadía e valor para, con armas improvisadas e rudimentarias", facer fronte ás preparadas tropas francesas.
As alarmas de Valga non estarán soas na batalla, senón que lle chegarán reforzos doutras zonas de Galicia. En Casaldeirigo estarán tamén alarmas de Ponte Caldelas e San Antoniño de Mos, arroupados por outros colectivos participantes como o grupo de Entroido Os da Troula, a asociación Casco Vello de Vigo ou a asociación Cabalar de Valga, baixo a organización do Concello e da asociación cultural Heroes de Casaldeirigo.
As actividades darán comezo ás cinco da tarde co desfile cara ás inmediacións da Capela da Saúde, onde se pasará revista ás tropas, izaranse as bandeiras dos países participantes e haberá unha homenaxe aos caídos. A continuación desenvolverase a recreación da batalla.
A actuación de Cantos de Taberna, das Pandeireteiras Virxe da Saúde e Trebóns do Berbés precederá a outra das citas salientables da tarde, a representación teatral da obra O Napoleón non se levou, escrita por Marcela Rodríguez e gañadora do Premio de Teatro A Guerra da Independencia en Valga. A obra será representada por actores afeccionados integrantes da Escola Municipal de Teatro e veciños.
Durante a tarde haberá degustación gratuíta de rosquillas e actividades para os máis pequenos. Á noitiña, un espectáculo pirotécnico iluminará a Capela da Saúde.
