No antigo Campo daFeira, cando finalizou a marcha polas rúas de Cuntis, un grupo de nenos que participan nas actividades do programa educativo Cuntilín foron os encargados pór voz á reivindicación que levou os veciños a participar nunha manifestación que concentrou a máis de medio milleiro de persoas que desafiaron a choiva.
"Por desgraza, estamos aquí, unha vez máis, pedindo un dereito co que xa deberiamos contar sen a necesidade de ter que pedilo", pero a carencia de médicos no Centro de Saúde está provocado que conseguir unha cita para ser atendido estea a converterse nunha tarefa ardua que implica unha longa espera de varios días, e inclusos semanas. Esta razón "obríganos a estar aquí de novo" argumentaron.
"Cuntis, a nosa vila, estase convertendo nun pobo esquecido, xa que nós, a súa xente, carecemos de algo tan esencial como é unha boa sanidade pública", subliñaron para denunciar a marxinación da que se consideran vítimas.
Pero ante esta situación, advertiron de que, lonxe de resignarse, os veciños seguirán loitando. "Non pregamos, esiximos a quen sexa necesario que se nos escoite e que se solucione xa este problema", indicaron. "Que nunca máis haxa a necesidade de ter que pedir algo que deberiamos ter", expuxeron entre os aplausos dos veciños de Cuntis.
Como estaba previsto, a manifestación partiu das inmediacións do Centro de Saúde pouco logo das 20.00 horas. As tres formacións políticas representadas na Corporación municipal (PSOE, PP e Veciñanza) realizaron unha convocatoria conxunta, que contou co apoio do BNG.
A demanda que expoñen á Consellería de Sanidade os portavoces dos veciños é que cubra as tres prazas de médico que lle corresponde a este municipio, de 5.000 habitantes, xa que desde hai varios meses este servizo está a ser atendido por un só profesional a xornada completa, que conta co reforzo dun compañeiro de forma puntual.
Esta situación está a provocar longas esperas para ser atendidos nas consultas de atención primaria e a sobrecarga do Punto de Atención Continuada de Caldas de Reis. Os portavoces dos tres grupos teñen previsto expor esta demanda ao xerente da EOXI, José Ramón Gómez, nunha reunión que estaba prevista inicialmente para onte, e celebrarase o día 5.
