Os veciños de Soutomaior volveron saír á rúa en defensa do consultorio médico de Arcade, un espazo no que segundo denuncia a plataforma SOS Sanidade Pública, os recortes están a pasar factura á cidadanía.
A protesta iniciouse puntualmente ás 12.00 na Praza de Tallo Río e discorreu polo centro de Arcade ata a zona do Campo da Feira, nas inmediacións do consultorio médico, onde os portavoces locais, Iago Treus, Alicia Lorenzo e Emma Ruíz, contaron co apoio dos responsables de SOS Sanidade Pontevedra Manuel Mesía e Juan Loureiro.
Treus foi o encargado de ler o manifesto, no que se pediu directamente a dimisión de Vázquez Almuiña ao berro de multiplíquese "por cero, señor conselleiro" e anunciáronse máis manifestacións "ata conseguir a Sanidade que nos merecemos".
Os responsables de SOS Sanidade explicaron aos veciños que, tras a primeira protesta (unha concentración pacífica, no verán, na Praza de Tallo Río) conseguíronse alguinas cousas. "Temos pediatra polas tardes sen ter que desprazarnos a Vilaboa", aínda que, sinalan, que a parte máis importante das demandas está por cumprir.
SOS Sanidade recorda que 'Arcade non é a vila que era hai 10 anos e non pode seguir coa mesma cantidade de médicos'
A plataforma recorda que "Arcade non é a vila que era hai 10 anos e non pode seguir cos mesmos médicos que había entón. Este lugar ten moita máis poboación ca entón". á vila corresponderíanlle, por cota, dous pediatras (no canto dun compartido con Vilaboa) e tamén por cantidade de cartillas, un médico de familia máis (en actualidade hai tres). Ademais, os veciños piden melloras no tempo de atención do resto de persoal do centro.
A convocatoria contou con ampla representación política. O máis destacado, a participación do alcalde, o popular Agustín Reguera, coas concelleiras Cristina González Pedras e Noelia Ocampo. Polo PSOE acudiu Verónica Montero, a portavoz municipal, acompañada dos deputados Patricia Vilán e Xoán Torrado, así como polos socialistas Tino Fernández e Víctor Pedreira.
O BNG contou co portavoz, Manu Lourenzo, así como co deputado autonómico, Luís Bará, e con varios dos edís na Corporación.
A convocatoria, anunciou Iago Treus, "non é a última, senón que seguiremos dando guerra ata conseguir a Sanidade que se merece esta vila".
