O Concello de Soutomaior retomou esta semana a actividade doutro dos centros municipais que se pecharon pola alarma sanitaria da covid-19, o centro de compostaxe comunitaria de Arcade.
A instalación, que fora pechada co decreto do estado de alarma, xa está habilitada para que os veciños poidan depositar os seus residuos como o facían antes da pandemia. A pesar diso, o Concello recomenda seguir todas as medidas de seguridade e hixiene xeral que actualmente se indican desde o Ministerio de Sanidade e a Consellería: uso de distancia social e máscara, así como de hixienizante ou hidroalcohol tras tocar superficies de contacto frecuente.
A reapertura do centro atrasouse durante uns días para actualizar a parcela na que se atopa o centro, que tras varios meses sen uso estaba invadida pola vexetación. Así, coa chegada da nova normalidade, o Concello anima aos máis de 200 veciños adheridos ao programa de compostaxe do centro comunitario de Arcade a volver colaborar na protección do medio ambiente a través da correcta xestión dos seus residuos orgánicos. Á súa vez, ínstaos a aproveitar, se así o desexan, o abono resultante tanto no uso de plantas de interior como nas súas parcelas.
Ademais dos 200 usuarios do centro de compostaxe comunitaria de Arcade, o Concello repartiu nos últimos anos máis de 180 unidades de composteiros individuais en vivendas unifamiliares do municipio. "Isto significa que, entre os usuarios de composteros individuais e os do colectivo de Arcade, hai máis de 400 familias apoiando a reciclaxe doméstica de xeito activo no concello", sostén o alcalde, Agustín Reguera, destacando que é unha cifra "da que nos podemos sentir orgullosos".
Do mesmo xeito, Reguera asegurou que, "ademais de aforrar e mellorar na reutilización de recursos, redúcense gastos xa que toda a materia orgánica que se aproveita no composteiro non se deposita no colector habitual e con iso axúdase a reducir os custos económicos que orixina o servizo de lixos".
