A Xefatura Territorial de Educación e o Concello de Poio colaborarán para recuperar a aula que resultou danada no CEIP Isidora Riestra trala caída do teito a pasada fin de semana. As obras iniciaranse "de xeito inmediato", segundo aseguraron este martes as institucións.
O xefe territorial de Educación, César Pérez Ares, e o alcalde de Poio, Luciano Sobral, acompañados de responsables da Unidade Técnica de Educación e da Inspección Educativa, visitaron a aula, situada na antiga casa do conserxe, que foi reformada hai cinco anos para destinala a aula de desdobre.
Segundo o acordo alcanzado, o Concello iniciará, "de xeito inmediato", os traballos de retirada e demolición de todo o interior da aula así como do falso teito que aínda permanece e que posteriormente será reformado. O alcalde considera que esta labor podería estar lista a mediados do próximo mes de marzo, momento no que comezará a Xunta a executar o novo baño que será instalado nunha zona máis luminosa e ventilada da aula.
César Pérez Ares agradeceu a axilidade e colaboración do concello para a busca dunha solución a esta situación, destacando o feito de que “non se producira ningunha desgracia persoal, xa que os danos foron importantes”. A maiores, tamén destacou que nos próximos días reunirase coa Anpa do CEIP Isidora Riestra para explicarlles as obras que se van a levar a cabo e as melloras previstas para este centro.
