Mafari Café compra tres parcelas do polígono de Barro por 1,6 millóns

A presidenta da Deputación de Pontevedra, Carmela Silva, informou de que a xunta de goberno provincial adxudicou este venres tres parcelas do polígono de Barro á empresa Mafari Café por un prezo de 1,6 millóns de euros. A firma "vai instalar unha nave destinada a oficinas e a centralizar toda a loxística e almacenaxe" para desenvolver a súa actividade empresarial. 

O grupo pontevedrés Mafari acumula 45 anos de traxectoria, e actualmente está especializada en equipar os establecementos hostaleiros coa maquinaria do sector do café e hostalería aínda que os seus primeiros pasos déronse no sector das máquinas recreativas, pero pronto se adaptaron ás necesidades do mercado e ampliaron os seus servizos. 

Carmela Silva valorou esta adquisición de parcelas como "unha boa noticia" e adiantou que Mafari construirá no polígono de Barro unha gran nave industrial. "Van ampliar todo o que ten que ver coa súa empresa e iso xerará máis e mellor actividade económica e tamén emprego".

PANADERÍAS ACUÑA. A presidenta da Deputación tamén sinalou que esta mesma semana "asinamos a venda doutra parcela" tamén no polígono de Barro, neste caso, para a empresa pontevedresa Panaderías Acuña. Esta firma, con 22 puntos de venda dos que seis son franquías, emprega a preto de 200 persoas. A súa intención é trasladar a Barro o obrador de pan afrontando para iso o investimento máis importante nos seus 75 anos de historia. 

A posta en marcha desta nova instalación implicará un aumento do seu persoal destinado ao proceso de produción que, a día de hoxe, ocupa a 57 traballadores pero que estiman que crecerá entre 6 e 10 empregados máis. 

A construción das instalacións estará lista o próximo ano 2021 e coa dotación de maquinaria e a transición ao novo proceso confían en que o obrador de pan que levará o nome de 'Rogelio Acuña' poida estar operativo no 2022.