Do despacho, á furgoneta. É o camiño que emprendeu Andrés Díaz, alcalde de Ponte Caldelas, que decidiu ofrecerse ás persoas maiores para facer por elas as súas compras de alimentos ou medicamentos.
"Son tempos duros e difíciles", explica Díaz, quen recorda que a situación de confinamento polo coronavirus é especialmente complicada para as persoas máis vulnerables e que son "a quen non podemos deixar de lado". Así, aproveitando a súa experiencia previa como casco azul da Onu en conflitos bélicos como o de Bosnia, o rexedor non dubidou en poñerse á fronte deste servizo.
Nun principio, apunta o propio Andrés Díaz, alcalde desde 2015, o encargado desa repartición ía ser un operario municipal, "pero os que temos son poucos e teñen que encargarse de servizos básicos", explica. Ademais, entendía que debería ser alguén "coñecido" polos veciños, para "darlles confianza", polo que ao final decidiu facelo el mesmo.
Toman nota das listas da compra solicitadas e entregan os produtos nas casas
Coa persoal municipal ocupado na desinfección de espazos públicos, do control da auga potable ou do mantemento das depuradoras, Díaz e outro edil da corporación municipal, Pepe Garrido, son os que recollen a lista de alimentos e medicamentos para facer a compra e entregarllelos ás persoas maiores nos seus propios domicilios.
"Van ser semanas de reclusión nas que temos que ser fortes e demostrar que, aínda que sexa desde a distancia, sabemos estar unidos para loitar contra o coronavirus", engade Díaz.
O rexedor socialista explica que, unha vez que os veciños chamen ao Concello coas súas peticións, a furgoneta que el mesmo conduce irá ao domicilio do solicitante para recoller a lista da compra, a tarxeta sanitaria e o diñeiro. Tras concluír con cada unha das xestións entregaranse as compras na vivenda destas persoas, tanto no centro urbano do municipio como nas parroquias do rural.
