O xulgado do Penal número 2 de Pontevedra resolveu este mércores mediante un acordo de conformidade condenar á pena de dous anos de prisión ás dúas propietarias e a responsable de riscos laborais dunha fábrica de portas situada en Barro na que faleceu un traballador nun incendio que tivo lugar o 28 de marzo do ano 2012.
Outras tres persoas resultaron feridas naquel accidente laboral ocorrido na nave de Comercial Vilanova en Curro ao explotar a caldeira debido a un mal funcionamento.
A investigación sinalou que na fábrica non había suficientes vías de evacuación en caso de urxencias, o que fixo que unha parte dos traballadores se viran atrapados e non tivesen máis remedio que saltar polas fiestras para fuxir das chamas.
Precisamente, o falecemento do traballador produciuse despois de que este saltase á rúa desde o segundo piso, xa que o lume bloqueaba a única saída. Ademais, este home carecía de contrato ao estar de baixa temporal cando se produciron os feitos.
O vindeiro luns retomarase o xuízo para resolver a responsabilidade civil e fixar as indemnizacións que percibirá cada un dos afectados.
