Os concellos da comarca están preparados para a celebración do Día das Letras Galegas. Música, teatro, exposicións e distintos eventos encherán o día nos distintos puntos arredor da capital.
Así, no Concello de Poio, o Centro Cultural Xaime Illa, en Raxó, acollerá o acto principal da programación coa que a Concellería de Cultura celebra o día, adicado este ano ao poeta de Valdeorras Florencio Delgado Gurriarán.
A partires das 17.30 horas iniciarase un evento presentado pola actriz e narradora Bea Campos. O acto tamén servirá para facer entrega dos premios ás persoas gañadoras nas diferentes categorías do Certame Literario Xaime Illa Couto. Está prevista a participación da Escola de Música Tradicional de Poio. Por outra banda, a conferencia coa periodista Sara Vila Alonso queda aprazada.
Asemade, seguirá aberta no propio centro cultural ata o mércores a mostra Cantámola en galego! A canción en galego no século XXI.
Ademais, o xoves 19 de maio Miguel A. Seixas, da Fundación Castelao, impartirá a conferencia Castelao, o Plan S e as carquexas amarelas, desde as 19.00 horas.
Por último, o venres 20 a compañía teatral Avelaíña ofrecerá, ás 21.00 horas, a representación da obra A liorta. Esta iniciativa está organizada pola SCD Raxó.
O Concello de Poio tamén colabora na organización de actividades impulsadas polo Ateneo Corredoira, en Combarro. Ás 13.00 horas terá lugar o espectáculo Máis Cantos, a cargo de Nelson Quinteiro. O colectivo local tamén habilita unha exposición na fachada do Ateneo, na que son protagonistas todos e todas as autoras homenaxeadas cada 17 de maio. A maiores, edítase, en formato dixital e en papel, a revista literaria O Baralle.
OUTROS MUNICIPIOS. No Concello de Barro, pola súa banda, a música será a protagonista da xornada, grazas ao concerto que ofrecerá a Banda de Música Xuvenil de Barro. Será ás 12.00 horas na Nave da Música e terá como protagonista o Día das Letras. A entrada é libre e gratuíta.
En canto a Cerdedo-Cotobade, os actos conmemorativos repartiranse en varias xornadas. Así, hoxe no Centro Cultural de Cerdedo ás 19.00 horas porase en escea a obra O Ladrón de Paraugas, de Xosé Luís Lueiro.
O 26 de maio, no Centro Cultural e Turístico Antonio Fraguas, de Carballedo, terá lugar un espectáculo de música sobre Florencio Delgado Gurriarán.
En Soutomaior queda aprazado ata o domingo 22 ás 17.00 o obradoiro ‘Verbas na rúa’ e ata o mesmo día ás 18.00 horas a actuación de Os Coribantes
O 29 de maio no Centro Sociocultural de Tenorio terá lugar a representación da obra de teatro musical Mitos e Lendas a cargo da Banda Unión Musical de Tenorio e o Grupo Migallas.
No Concello de Soutomaior os actos ían celebrarse ao aire libre, polo que, ante a previsión de chuvia foron adiados ata o vindeiro domingo. Así, queda aprazado aota o domingo 22 ás 17.00 o obradoiro Verbas na rúa e ata o mesmo día ás 18.00 horas a actuación de Os Coribantes, formación tradicional de Ponte Caldelas. Son citas gratuítas que se desenvolverán en Talo Río.
Para o día 20 mantense o espectáculo dirixido ao público infantil Brinca Vai, que terá lugar o día 20 ás 18.30 horas na Biblioteca.
En Vilaboa este martes ás 12.00 horas en Riomaior recibe á contacontos Olga Abad, nunha sesión gratuíta para menores de catro anos. Os actos seguirán con Migallas Teatro o venres, que desde as 19.30 presentará Brincadeiras da lingua e o sábado, con Caxoto, a trastenda da língua, desde as 12.00 horas, todos na Casa da Cultura de Riomaior.
