O alcalde de Barro, José Manuel Fernández Abraldes, recibiu esta semana á responsable da empresa Mariscos Alumar, unha firma que se incorpora ao polígono industrial Barro-Meis coa adquisición dunha parcela de 1.800 metros cadrados e que contribuirá a afianzar ao parque empresarial no sector da alimentación, ao que se dedica a maior parte das empresas que se instalarán no mesmo.
Mariscos Alumar S.L. conta cun proxecto investidor de 1,5 millóns de euros, que se iniciou recentemente cos primeiros pasos da construción da nave, que podería estar lista no prazo de seis meses, polo que a responsable de mercadotecnia da firma, Emilie Lasbezeilles, adiantou que as previsións reais son as de pór en marcha a actividade na primavera do 2019. A previsión de creación de postos de traballo variará en función da evolución do proxecto e do crecemento da firma, que conta con profesionais avalados por máis de 20 anos de experiencia no sector.
A responsable da empresa sitúa a data da apertura da actividade na primavera do ano próximo
A instalación situarase nunha nave de 1.800 metros, que foi vendida a través do Consorcio Provincial á empresa por 182.000 euros. O proxecto aprobado ocupará 1.300 metros cadrados de superficie, no que, ademais do procesado de marisco e produtos do mar, destinarase un espazo de 200 metros a oficinas.
Ademais, as dúas plantas da nave contarán con cámaras de frío e conxelado, caldeira de vapor e maquinaria para a transformación e distribución de produtos do mar.
Mariscos Alumar S.L. explica que ten como obxectivo alcanzar o mercado europeo con novos produtos baseados na calidade do sector pesqueiro galego e nas necesidades dun público cambiante tamén nas súas demandas con respecto aos produtos do mar.
O alcalde desexou á responsable da empresa "o agradecemento do Goberno local por ter escollido o polígono industrial de Barro para emprazar o seu proxecto empresarial" e desexou "éxitos na súa andaina" á empresa.
