Unha "Bibliocra" para soñar

O CRA Plurilingüe Consuelo González Martínez elexiu a semana do Día do Libro para estrear unha renovada biblioteca na que hai espazos novos para xogar, calmarse, e, sobre todo, ler
Un dos contos da semana pasada acompañado por música e que foi seguido atentamente por nenos e nenas. DP
photo_camera Un dos contos da semana pasada acompañado por música e que foi seguido atentamente por nenos e nenas. DP

OS e as nenas que acuden ao Colexio Plurilingüe Rural Agrupado de Vilaboa comezaron recentemente a gozar dos privilexios de ter unha biblioteca totalmente renovada.

O centro Consuelo González Martínez vén de completar un proceso de mellora das instalacións destinadas á lectura, que se ubican la unidade rural de Barciela, onde o Concello e a Xunta cooperaron en traballos que permitiron que o centro conte cun espazo moderno no que o alumnado poderá participar en actividades, desenvolver as súas habilidades creativas e coller gusto pola lectura.

Para estrear como se merece as instalacións, o equipo docente organizou unha Semana do Libro moi especial na que houbo contacontos a cargo das familias, visitas dos alumnos e alumnas acompañados de seus pais e irmáns e disintos encontros nos que se exploraron as novas instalacións.

O novo espazo lector estreouse con contos dos pais e nais

Máis aló da desaparición de tabiques e da renovación de materiais, a nova "Bibliocra" conta con moitas novidades como o espazo maker con robots e pezas de construción de Lego; un espazo adicado á música que deixou abraiados a moitos e moitas alumnas, e un recuncho preparado para a calma. Por suposto, no lugar non faltarán os xogos e a oferta literaria e de información que é necesaria tamén para os proxectos e traballos escolares.

Ademais do gusto de saberse destinatarios dun centro pensado con todo mimo para eles, os alumnos e alumnas puideron gozar do privilexio de contar cos mellores contacontos: nais e pais de todas as familias que estes días, en xornada de tarde, desenvolveron pequenas representacións para a comunidade escolar.

O primeiro día a asistencia foi tímida, de oito alumnos. O segundo acudiron dez, o terceiro 18 e en todos se palpou tamén o interese de irmáns e familiares por coñecer esta dotación.

Pero non todo son relatos, aventuras e sesións musicais. Para poder contar con este espazo tamén houbo que botar man dos números, pero iso xa foi cousa dos maiores. Deste xeito, o Concello investiu 10.000 euros nas obras de remodelación da planta alta da unidade escolar. O centro, é dicir, Educación, achegou 9.500 euros do Plambe. De feito, do Plan de Mellora de Bibliotecas Escolares saíron 6.000 euros e outros 3.500 do Plan LIA de mellora das instalacións bibliotecarias dos centros galegos.

comentarios