Buscan a dous cans perdidos tras chocar un coche contra o remolque no que ían en Arcade

O accidente de tráfico rexistrado en Arcade o pasado domingo no que un turismo colisionou, por alcance, co coche dun cazador e o seu remolque, provocou a perda de dous cans que están desaparecidos desde ese momento.

Membros de Protección Civil de Soutomaior indicaron que se desenvolveron búsquedas e se difundiu o aviso porque os dous cans fuxiron do remolque no momento da colisión, asustados polo impacto e, probablemente, en estado de shock por todo o rebumbio xenerado a raíz do sinistro.

Os cans foron vistos correndo pola zona do Campo da Feira, e nesa contorna, e puideron desplazarse en dirección Redondela, así que nesas dúas áreas é onde se centran actualmente as pesquisas para dar con eles.

O dono dos animais, un cazador da zona de Pontevedra, saíu ileso do accidente, pero non así outros dos seus dous cans que tamén ían no remolque acoplado ao turismo, que precisaron asistencia veterinaria polas mancaduras que lles xerou o impacto. Protección Civil precisa que, en todo caso, ambos están xa fóra de perigo.

En canto ao outro turismo sinistrado, ía conducido por un mozo que tamén precisou asistencia médica nos instantes posteriores ao accidente, aínda que, tamén segundo as mesmas fontes, xa está de alta hospitalaria.

Fontes de Protección Civil de Soutomaior, que acudiron o domingo ao sinistro para colaborar nas tarefas de atención aos accidentados, precisaron que os dous animais teñen chip e son moi fáciles de identificar, polo que solicitan colaboración cidadá para que, no caso de avistalos, se comunique a zona onde foron detectados e proceder á súa recuperación.