Cando falta apenas unha semana para que os alumnos de Infantil e Primaria regresen ás aulas, os veciños da Bretoña, en Barro, retoman as denuncias contra os propietarios de varios cans de raza perigosa que campan ás súas anchas polo barrio, a escasos metros dunha parada de autobús e sen medidas de control, posto que a casa na que están os animais nin sequera está habitada todos os días da semana.
Aínda que hai un peche perimetral, os animais saen á rúa sempre que poden
Os veciños presentaron un escrito ao Seprona recordando a situación (a sucesión de denuncias repítese desde que, hai ano e medio varios dos canes atacaron a unha residente na zona) e alertando de que non hai nin 50 metros de distancia entre a parada do transporte escolar e a casa onde viven os cans. Segundo os denunciantes "na casa hai dous cans adultos e ás veces máis. Non se sabe se a usan como criadeiro, aínda que se viron cachorros en ocasións".Os cans pertencerían á raza American Staffordshire Terrier, incluída na lista de cans potencialmente perigosos. Aínda que son moi recoñecidos pola súa fidelidade, alcanzan grandes dimensións e peso e destacan pola fortaleza das súas mandíbulas. Estes canes, requiren, entre outras medidas, saír á rúa con boceira e correa, acompañados dos seus propietarios.
No caso da Bretoña, a casa onde os custodian non está habitada. Aínda que hai un peche perimetral, os animais saen á rúa sempre que poden, dado que son capaces de realizar buracos con facilidade na reixa de malla. "Denunciouse varias veces ao Concello e cónstanos que hai preocupación por parte do alcalde. Puxemos en coñecemento da Garda Civil a situación, pero nunca tivemos resultado", lamentan os afectados.
DESDE 2017. Os veciños déronse conta da presenza destes cánidos (que na primeira época eran sete), a principios de 2017, cando atacaron a unha das habitantes na zona, que saíu a pasear ao seu propio can. Segundo relatan, nesa ocasión, fixeron falta outras dúas persoas para poder liberar á muller atacada, posto que os animais, varios deles cachorros, non cesaban nas súas dentadas nin ante o emprego da forza.
Noutras dúas ocasións, polo menos, rexistráronse incidentes similares, nos que, segundo relatan no texto enviado ao Seprona, os atacados foron presas do pánico polo ataque dos cánidos. No caso dos pais de menores, algúns incluso valoran a posibilidade de levar aos nenos en coche ata a parada, aínda que estea preto das vivendas para garantir así que os menores non sexan atacados polos animais sen control. Os afectados confían en que as autoridades tomen medidas canto antes.
