A Romaría Tradicional de Gaiteiros Manuel Villanueva dará o próximo 1 de xuño o pistoletazo de saída á programación dos que, Entroido aparte, son os festexos de maior enxunlla en Poio. As Festas de San Xoán volven de novo para dar a benvida ao verán cunha gran cantidade de actividades, actos e, sobre todo, moitas novidades. O alcalde, Luciano Sobral, e a responsable do departamento de Cultura, Lida Salgueiro, foron os encargados de dar a coñecer as iniciativas que se desenvolverán ata o 5 de xullo, cando a Sardiñada Popular da Casa Rosada poña o broche de ouro á programación.
Como cada ano, o día previo ao acendido das fogueiras será unha das xornadas grandes. Nesta ocasión, a elixida para ler o pregón (21.00 horas) será a cantante e actriz Eva Iglesias Fernández, coñecida, entre outras cousas, pola súa participación en diferentes programas da Televisión de Galicia, como Land Rober. Á hora de apostar pola artista galega, o Concello tivo moi en conta o protagonismo que terá a música durante estas semanas. E é que algunhas das novidades que se introducen este ano no calendario son, precisamente, espectáculos musicais ao aire libre. Ademais, mantense os exitoso pasacalles previo á lectura do pregón, que estará dirixido por Marcelo Dobodee Adrián Saavedra.
Con respecto ao día das cacharelas, ás 23.30 producirase o tradicional espectáculo pirotécnico, ademais dunha verbena amenizada polas orquestras D'Moda e Xacobeo. O lume converterase no gran protagonista a partir de medianoite. Salgueiro informou de que os permisos para o aceso de fogueiras tramitaranse desde o 3 ao 17 de xuño. Non será posible realizar esta actividade nas praias de Xiorto e Cabeceira.
O día do patrón, 24 de xuño, haberá unha misa solemne ás 12.00 horas, mentres que pola noite actuarán os grupos Palladium e Ritmo Novo. Tanto o 25 como o 26 os actos relixiosos terá como protagonistas a Santa Trahamunda e San Fructuoso. Olympus e A Oca e Marbella e América de Vigo serán as orquestras que interpretarán temas dabondo coñecidos na Seca nesas noites.
Ademais, tampouco faltarán os habituais fogos artificiais de fin de festa.
