A Policía Local de Poio e os Guardapescas da Confraría de Pontevedra asestaron o pasado venres un novo golpe ao furtivismo, tras cazar 'in fraganti' a dúas persoas extraendo ameixa japónica na praia da Ostreira, en Campelo. No momento da súa localización, os sospeitosos xa conseguiran reunir preto de 20 quilos desta especie, 15 dos cales non alcanzaban o tamaño mínimo que marca a lei.
Os autores desta acción son veciños do propio municipio e contan con numerosos antecedentes tanto penais como administrativos por actividades relacionadas co furtivismo. Fontes policiais explicaron que a práctica máis habitual por parte dos furtivos é a de extraer o molusco en sacos e, posteriormente, escondelo en diferentes puntos da costa ou en coches en desuso que adquiren para levar a cabo estas accións.
Trátase dun grupo organizado, que, logo de retirar o marisco e escondelo volven ao lugar para recuperalo e vendelo ilegalmente en bares e en restaurantes. Nos últimos meses, axentes e membros da Confraría xa atoparon varios destes 'zulos'.
Con motivo da inminente chegada do Nadal, as autoridades apostan por extremar a vixilancia, xa que a campaña do Nadal pode provocar un aumento deste tipo de prácticas ilegais. Os dous furtivos enfróntanse a unha nova denuncia como presuntos autores dun delito contra a flota e a fauna.