Foi unha semana convulsa para os traballadores e responsables dos locais do Centro Comercial A Barca. O martes coñecíase a nivel oficial o que o persoal de Carrefour soubera apenas uns días antes: a insignia alimenticia do centro comercial non renovará nas súas instalacións e pecha a actividade no centro comercial de Poio. Aínda que en 24 horas constatouse tamén que había listo un contrato para que unha nova empresa do sector, Vegalsa-Eroski, ocupase as instalacións, a incerteza imperou por uns instantes, en especial, entre os clientes e arrendatarios. "Creouse confusión co peche do hipermercado, entendendo que era o Centro Comercial o que pechaba, porque hai moita xente que pensaba que todo o centro era de Carrefour", indican desde a xerencia do centro, especificando que, precisamente, sucederá o contrario. Con máis de 30 anos de vida, a chegada dunha nova marca, poderá ser un revulsivo para este conxunto de locais comerciais. "Durante o peche temporal do hipermercado para o cambio da insignia de alimentación, todos os demais establecementos seguirán funcionando e as nosas instalacións continuarán abertas ao público", indican, garantindo que os clientes fieis ao centro terán abertos os seus establecementos de referencia.
Con todo, o anuncio de Vegalsa-Eroski, de que se abordará un período de obras entre a saída de Carrefour e a apertura do seu hipermercado, prevista para novembro, dá lugar tamén á apertura dun paréntese que a propiedade, é dicir, os 45 integrantes da comunidade de propietarios, poderán aproveitar para facer tamén reformas e actualizacións para modernizalo. "Desde o Centro Comercial estanse avaliando unha serie de melloras enfocadas a ofrecer unha experiencia de visita máis atractiva para os clientes, dentro das propostas que se están actualmente avaliando atópanse: zonas de descanso, pantallas dixitais, cambio de imaxe nalgunhas zonas, entre outras. O obxectivo é brindar aos nosos clientes un ambiente seguro e cómodo", indica a xerencia.
Na mesma liña, os responsables do devir do parque comercial teñen sobre a mesa outra proposta para algúns dos propietarios: trátase de strong <>buscar fórmulas para ampliar espazos, dando así resposta a posibles demandantes de maiores superficies para implantar as súas marcas.
¿A que responde esta idea? Por unha banda, á propia historia do centro comercial: poucas destas dotacións sobreviven a trinta anos de historia, e como tal, este centro comercial ten un modelo de propiedade a algo distinto dos actuais: hai moitos donos de locais de tamaño pequeno e mediano. De feito, en actualidade, e segundo a propia xerencia, aínda que uns 20 locais están baleiros, o tamaño dos mesmos, unidos, apenas supera o 20% da superficie de venda do centro. Unir locais permitiría que, ademais dunha locomotora do sector da alimentación, o centro puidese contar con algunha franquía téxtil ou de lecer que, en actualidade, no sector, son consideradas outros dos motores máis potentes que pode ter o conxunto das instalacións para atraer ao público.
Tal e como explican desde A Barca, "existen actualmente varias negociacións en curso con operadores de distintos sectores. A planta baixa ten a particularidade de ter locais cunha superficie moi pequena, a nosa proposta é unir varios para poder ofrecer locais con maior superficie, é por isto que estamos en conversacións cos propietarios", remarcan. De feito, o cambio de hipermercado foi un dos elementos que espertaron o interese de novos posibles investidores.
En actualidade, A Barca é unha comunidade que conta con 45 donos. Máis do 50% da propiedade dos locais é galega, aínda que algunha firma nacional como Décimas, Telepizza ou Mr. Minit xa posúen parte da superficie. Con respecto á propiedade do local onde se situará Vegalsa-Eroski non é de orixe autonómica, algo que compensa con fartura "este novo arrendatario, que ten un 50% de capital galego", o que salienta máis a importancia que ten a filosofía deste centro comercial, no que os pequenos comerciantes e os produtores locais, teñen un papel de peso. Isto último é algo moi valorado, xunto coa proximidade das súas instalacións co centro de Pontevedra e coa zona mais poboada de Poio, pola clientela do mesmo.
A saída da crise sanitaria será outro dos elementos que previsiblemente cambiará o panorama destas instalacións nuns meses. Non en balde, un 10 % do seu espazo dedícase á hostalería e algunhas das súas instalacións, como O Mundo de Sepo, dedicado ás festas infantís e con 800 metros de superficie (a metade da planta alta), permanece pechado desde o inicio da pandemia e segue pendente da súa reapertura.
