Os montes de Carballedo e Loureiro contarán cunha nova superficie de monte reforestado. O proceso iniciouse este xoves, co rechamante desembarco dun grupo de homes e mulleres ataviados con forros polares vermellos. Trátase de 50 integrantes do cadro de persoal da firma Generali Seguros que, con esta iniciativa, estréase no ámbito das accións de reforestación e rexeneración ambiental.
Plantaranse, no transcurso desta actividade, un total de 12.000 árbores, cos que se cubrirá unha porción de monte dunhas 14 hectáreas.
Entre as especies a plantar hai exemplares de Pinus pinaster (piñeiro común), Quercus robur (carballo), Salix atrocinerea (salgueiro), Sorbus aucuparia (serbal), Betula alba (bidueiro branco) e Crataegus monogyna (espino branco).
A empresa encargada de implementar todo o procedemento foi a firma Forestalis, e, neste caso, as comunidades de montes que puxeron o terreo (coa documentación necesaria para estes cultivos dentro dos seus respectivos plans de ordenación), son as de Carballedo e Loureiro.
Do mesmo xeito que noutras das plantacións realizados nos últimos meses no municipio, a proposta quere compensar o dano ambiental causado polos incendios. Carballedo e Loureiro padeceron as dúas ondas máis devastadoras da provincia no inicio de século: os de 2006 e os de 2017 e non faltaron outros sustos en anos posteriores.
Así, segundo recorda Generali "segundo os datos achegados polo Sistema Europeo de Información de Incendios Forestais, 2022 terminará co peor rexistro de incendios en España nos últimos 15 anos, con 293.155 hectáreas".
Ante isto, tal e como explicou Javier Aguirre de Cárcer, director de Comunicación e responsable de Sustentabilidade da firma, "Generali, quere pasar á acción" e iniciar actuacións para recuperar os bosques "que son vida para nós e para os nosos fillos". Deste xeito, a firma, que é unha aseguradora de ámbito mundial con presenza en 46 países, escolleu os montes de Cerdedo-Cotobade para desenvolver a súa primeira acción comunitaria de reforestación entre todos os países nos que se atopa a firma.
á súa vez, o responsable destacou "a alegría que nos dá poder realizar esta acción" nunha das zonas "onde tiveron maior impacto os incendios forestais" e cun grupo de 50 traballadoras e traballadores chegados principalmente de Galicia, pero tamén de Madrid, Barcelona, Valencia, Sevilla, Bilbao, Asturias que só na xornada inicial tiñan pensado alcanzar a cifra de 2.000 árbores plantadas. Unha vez que a comitiva volva aos seus postos, a tarefa seguirá realizándose mediante a contratación de empregados e empregadas da propia localidade.
"E non se trata de realizar un impacto e irnos: este bosque manterémolo no tempo", aseverou o responsable de Sustentabilidade de Generali. Jorge Cubela, que foi o anfitrión durante un tramo da mañá deste grupo, agradeceu o interese das empresas por seguir reforestando o municipio "e a apertura" das comunidades de montes para estas cooperacións "que nos inspiran e motívannos para seguir coidando o noso monte".
