Cerdedo-Cotobade recupera os Baños de San Xusto

O presidente da Xunta, Alberto Núñez Feijóo, destacou a recuperación dos Baños de San Xusto en Cercedo-Cotobade como "un exemplo da aposta pola conservación do patrimonio natural e cultural" do Goberno autonómico a través dos Pactos pola Paisaxe. 

"Recuperamos unha paisaxe significativa para os veciños, situado nun enclave rodeado de elementos de grande interese", destacou o presidente na súa visita este mércores ás instalacións, onde reivindicou o deber de coidar "e preservar" a paisaxe "para as próximas xeracións". 

No novo balneario recuperáronse as bañeiras e reconstruíronse tres muíños, un transformado en sauna

Feijóo recordou que, ao amparo do Pacto pola Paisaxe —asinado en 2019 co concello pontevedrés e "o primeiro posto en marcha en toda Galicia"—, púidose rehabilitar desde cero a central hidroeléctrica, "a primeira fábrica de luz de Pontevedra". Inaugurada en 1915, supón un "valioso expoñente do patrimonio industrial galego, que agora dará servizo como balneario". 

Segundo explicou a Xunta nun comunicado, tamén se recuperaron as bañeiras exteriores, onde foron instaladas novas pilas e mantéñense as antigas "como elemento ornamental". Así mesmo, rehabilitáronse as fontes e o depósito de auga, "descubríndose as augas termais da zona", e reconstruíronse tres muíños, un deles transformado en sauna. 

A casa do muiñeiro tamén foi reconstruída para acoller o almacén da caldeira de biomasa coa que funciona o balneario, foron mellorados os accesos con novas zonas de aparcadoiro e acondicionouse a contorna.