Tras varias semanas de tira e afrouxafinalmente o Concello de Poio e a Asociación Fogarcan-Amigos da Canceira acabaron por entenderse. O floco municipal continuará operativo, desenvolvendo un labor que se iniciou hai practicamente dúas décadas. Ambas as partes lograron este martes chegar a un acordo, que servirá para impulsar un novo convenio de colaboración, no que se introducirán importantes novidades con respecto ao vixente.
Os integrantes da agrupación asumirán máis labores e o Concello contratará a unha persoa para as instalacións
A través desta fumata branca, o colectivo verá incrementada de forma substancial a subvención que viña recibindo nos últimos anos polas tarefas que desenvolvía nas instalacións situadas no lugar da Armada. Se ata agora percibía 13.000 euros, a Administración poiense comprométese a aumentar a partida ata os 20.000 euros. Ademais, o tripartito contratará a unha persoa para xestionar as instalacións, algo no que tamén se implicará activamente Amigos da Canceira. Neste sentido, os membros da agrupación que acudiron este martes á negociación mostráronse dispostos a participar en tarefas como a recollida de animais abandonados, entre outras.
Por parte do Goberno local acudiron ao encontro a tenente de alcalde, Chelo Besada; a edil de Participación Veciñal, Silvia Díaz, e o concelleiro de Medio Ambiente, Xosé Luis Martínez. Este último mostrouse satisfeito "polos compromisos que adquirimos as dúas partes" e destacou "a vontade que tivemos todos desde o principio á hora de apostar por manter este servizo". Neste sentido, cabe recordar que Poio é un dos poucos concellos das Rías Baixas que dispón dunhas instalacións propias para acoller a animais abandonados.
Tamén destacou a importancia do acordo Silvia Díaz, que explicou que o convenio entrará en vigor a partir do próximo ano, xa cos Orzamentos de 2020 aprobados.
Pola súa banda, Amigos da Canceira expresou este martes a súa satisfacción pola "predisposición ao diálogo" e celebrou "as bases para a continuidade na tarefa de xestión da canceira municipal por parte da asociación que representamos, compatibilizando a eficiencia nos custos cunha sinceira preocupación polo benestar animal".
