O Concello de Soutomaior iniciou a semana pasada os traballos de creación do primeiro xardín da diversidade do municipio. Un novo espazo de lecer e esparexemento deseñado para dar visibilidade e normalizar as diferentes sensibilidades e formas de sentir.
O alcalde de Soutomaior, Agustín Reguera, e a edil de Servizos Sociais, Cristina González, visitaron os traballos de instalación dos diferentes elementos do parque. "Esta clase de iniciativas fan do noso municipio un lugar máis amable, acolledor e respectuoso con todas as sensibilidades", explicou González, que indicou que, se nada o impide, estas tarefas completaranse durante a semana actual.
O xardín estará situado xunto ao parque canino de Arcade e contará con diferentes elementos e un mobiliario público específico coa madeira tradicional como elemento base. Así, instalaranse tres elementos de xogo, varias banquetas, un carreiro de pedra natural e paneis artísticos e informativos de temática.
O xardín da diversidade é unha iniciativa promovida pola Concellería de Igualdade e a súa instalación conta cun orzamento final de 17.000 euros que se financiarán exclusivamente con fondos propios municipais. O Concello anunciou que o acto de inauguración, que contará con contacontos, talleres de estampado de camisetas e animación musical para o público xuvenil e adulto, será o vindeiro venres día 20.
