A Xunta de Goberno local abordará na sesión do próximo luns a contratación dos traballos para arrombar a alameda situada na Praza do Mosteiro, ás portas do emblemático templo de Poio e da Casa Consistorial. Trátase dun proxecto que ten como obxectivo principal mellorar o estado no que se atopa o firme. Aínda que inicialmente a intención do Goberno local era a de dotar á parcela dunha superficie empedrada, ademais dunha zona de céspede, finalmente as tarefas limitaranse exclusivamente a eliminar as fochancas utilizando zahorra. Segundo explicou a tenente de alcalde, Chelo Bicada, a Dirección Xeral de Patrimonio non deu o visto e prace á proposta presentada polo Concello.
A actuación terá un prazo de execución de dous meses aproximadamente e tamén incluirá a instalación de canalizacións no perímetro da alameda. O orzamento ascende a 60.000 euros. Para a realización destes traballos prohibirase temporalmente o estacionamento de vehículos.