O próximo 1 de outubro botará a andar unha nova edición do coworking do Vivieiro de Empresas de Barro. Será a cuarta e conta con algo máis dunha vintena de prazas para proxectos emprendedores da provincia pontevedresa que estean en fase de desenvolvemento ou sexan creados recentemente.
A iniciativa está promovida pola Deputación de Pontevedra e a Escola de Organización Industrial (EOI) coa cofinanciación do Fondo Social Europeo, de modo que volverá ser totalmente gratuíta para os e as participantes. O vindeiro venres concluirá o prazo de inscrición para as persoas interesadas en conseguir algunha das prazas dispoñibles (a demanda está a ser tan elevada como sempre) e a continuación comezará a selección dos beneficiarios.
Co obxectivo de promocionar o coworking e solucionar posibles dúbidas, o martes tivo lugar unha xornada de portas abertas nas súas instalacións, situadas no polígono industrial de Barro-Meis.
Como mentora residente do coworking, Carmen Costas é a persoa que coordina este programa de apoio ao emprendemento e, segundo explicou, esta próxima edición prolongarase desde o 1 de outubro ata o 20 de decembro. "O programa é igual ao das edicións previas, pero nesas anteriores a súa duración foi maior, prolongándose durante máis meses, mentres que neste caso será máis intensivo, pois en menos meses sumará as mesmas horas de mentoría e terá o mesmo nivel de excelencia" precisou.
Costas recordou que os emprededores participantes terán á súa disposición de forma gratuíta as instalacións, que inclúen entre outros servizos rede wifi, o Depo FabLab ou laboratorio de fabricación dixital con impresora 3D, sala de reunións, etcétera. Pero ademais poderán asistir a talleres de domótica e robótica e recibir formación para potenciar as súas competencias en emprendemento e xestión de proxectos e contarán con mentores individuais, "todos eles profesionais e empresarios con experiencia", destacou a coordinadora.
Do mesmo xeito que os anteriores, o cuarto coworking do Viveiro de Empresas de Barro será multisectorial, de maneira que está aberto a proxectos emprendedores de diferentes áreas, aínda que nesta edición que arrincará o 1 de outubro terán un forte compoñente de enfoque sostible.
"Todos os modelos de negocios poden ter a sustentabilidade como eixo transversal", resaltou Carmen Costas.
