Causar un accidente danando mobiliario urbano, darse á fuga e ir ao volante ebrio. Son os tres feitos que motivaron que a Policía Local de Poio denunciase a un condutor do municipio de Pontevedra que o venres ás 22.00 horas protagonizou un accidente na rúa Pernas Pena, en San Salvador. A Policía Local acudiu tras a chamada alertando de que un accidente provocara a caída dun farol sobre o muro dunha casa.
Polo camiño xa se atoparon co coche que causara o accidente: tiña a defensa moi danada e o vehículo circulaba de modo errático, de modo que os axentes observaron que había evidencias de que o condutor estaba baixo a influencia do alcol. A proba pertinente arroxou un resultado de 1,47 mg por litro de aire expirado, unha taxa que case sextuplica a permitida. Os feitos son constitutivos de delito contra a seguridade viaria con resultado de accidente e danos no mobiliario urbano, polo que se trasladaron dilixencias ao Xulgado de Garda de Pontevedra. Ademais, denuncióuselle administrativamente por fuxir sen comunicar o accidente.
