A instalación dun pivote na vía pública en Campelo, á altura da Rúa Beiramar, ademais de dous paneis nos que se informa da prohibición de estacionar, está a causar desconcerto en Poio. Así o advirte o grupo municipal do Partido Popular, que asegura que, en principio, non existe ningunha restrición oficial para aparcar nestes espazos.
Esta cuestión foi abordada durante a celebración da última Comisión de Urbanismo. Segundo apunta a concelleira do principal grupo da oposición Rocío Cochón, estes carteis, que poden ser confundidos con sinais de tráfico, informan de que o estacionamento só está permitido a vehículos autorizados. Ademais do citado pivote, "estes elementos están postos coa intención de simular que o estacionamento nese espazo está restrinxido".
Cochón denuncia que os veciños, en ocasións, teñen medo de deixar alí os seus vehículos "ante posibles consecuencias", polo que remitiron un escrito ao Goberno municipal para que aclare esta situación. Neste sentido, Cochón entende que é necesario que o tripartito aclare canto antes "cal é a verdadeira situación normativa do aparcamento nese emprezamento". Ademais, insta aos dirixentes locais a que "no caso de que sexa certo de que non existe prohibición" aclaren as medidas que se van a levar a cabo.
O Partido Popular entende que a resposta do Goberno municipal debe facerse efectiva "o antes posible", ben sexa de xeito directo aos veciños de Campelo ou ás preguntas e escritos presentados pola propia agrupación da oposición. Neste sentido, a portavoz popular lamenta que os dirixentes "continúan utilizando as mesmas tácticas dilatorias e de opacidade que se veñen repetindo sistematicamente ao longo dous últimos 25 anos". A concelleira do PP vai máis aló ao apuntar que "non se dan respostas nin aos cidadáns nin á oposición".
Fontes do Goberno local aseguran que esta situación corresponde "a un conflito entre particulares" que será resolto sen entrar en cuestións "políticas ou partidistas".
