Axentes da Garda Civil detiveron a pasada fin de semana, en Poio, a unha muller sobre a que pesaba unha orde xudicial de procura por un delito contra a seguridade viaria.
Segundo informaron fontes do Instituto Armado, esta intervención realizouse no marco dos dispositivos de vixilancia e seguridade cidadá despregados na contorna dos poboados do Vao.
Así, unha dotación da Garda Civil interceptou unha muller, veciña de Pontevedra, sobre a que pesaba unha orde de procura e personación emitida polo xulgado de instrución número 3 de Pontevedra, en relación cun delito contra a seguridade viaria.
Por outra banda, e tamén no ámbito destes dispositivos de seguridade, foron interceptados, o pasado sábado e o domingo, respectivamente, dous homes, veciños de Pontevedra e de Marín.
No seu caso, os axentes comprobaron que circulaban co carné suspendido por carecer de todos os puntos. Ademais, no caso do veciño de Pontevedra, tamén deu resultado positivo na proba de alcoholemia.
Os dous condutores foron denunciados e notificóuselles a súa condición de investigados penalmente por supostos delitos contra a seguridade viaria.
