A presidenta da Deputación de Pontevedra, Carmela Silva, reivindicou este martes, no acto organizado para conmemorar o Día Internacional da Memoria Trans, unha lei trans estatal integral.
O obxectivo sería que esta norma incidise no dereito destas persoas a non "ser patologizadas" e que poidan exercer "o dereito á autodeterminación de xénero", ao cambio de nome e sexo, a acceder en igualdade de condicións á sanidade pública, á necesidade de incluír a transexualidad no currículo educativo e a castigar os delitos de odio cara a este colectivo.
Máis dun centenar alumnos de tres centros educativos da capital da provincia asistiron á lectura dun manifesto e á presentación da curtametraxe documental Sorrisos transformadores, que percorre 36 municipios galegos recollendo casos reais de menores transexuais.
A película está producida pola Deputación de Pontevedra en colaboración coa Asociación Arelas, un de cuxos membros, Brais Fernández, foi o encargado de ler un manifesto no que recordou e honrou a vida de persoas trans que foron asasinadas nos últimos anos.
Tamén reivindicou o dereito do colectivo a vivir en espazos seguros, empezando pola infancia e pola adolescencia. Así mesmo, fixo fincapé nos distintos campos nos que as persoas trans son discriminadas, como son o ámbito médico, laboral e legal.
DEREITO A ELEXIR LIBREMENTE
Logo da lectura do manifesto, inaugurouse un banco decorado coas cores que representan ao colectivo trans e que está instalado á sombra do emblemático magnolio dos xardíns de Vicenti.
"A sociedade non pode ser digna nin decente cando as persoas non teñen dereito a elixir libremente a súa vida", manifestou Silva no marco dun acto no que estivo acompañada pola deputada responsable de Igualdade, Isaura Abelairas; a presidenta da Asociación Arelas de Familias menores Trans, Cristina Palacios; e a fotógrafa e directora Noemí Chantada.