Máis de 150 persoas participaron este xoves na terceira convocatoria anual da Escola de Igualdade María Vinyals, que este ano se centrou no Pacto de Estado contra as violencias machistas e concentrou no Castelo de Soutomaior ás mulleres máis relevantes en igualdade do panorama galego e estatal. Na cita, organizada pola Deputación de Pontevedra, a súa presidenta, Carmela Silva, recordou ás quince mulleres asasinadas no que vai de 2018 e dedicoulles estas xornadas, a elas e "a todas as que sofren violencia física ou psicolóxica". Ademais, asegurou que o deste xoves era un "día feliz" por ver, por primeira vez, "un Consello de Ministros integrado por once mulleres e sete homes".
Esta escola pretende ser "un lugar de reflexión, de compromiso, de debate e de coñecemento no mundo local" e, tras a inauguración por parte de Silva e a deputada de Igualdade, Isaura Abelairas, foi o momento da conferencia sobre a xénese, evolución, situación actual e perspectivas do pacto de Estado, a cargo de Ángeles Álvarez, militante feminista que tivo un papel crave na posta en marcha do mesmo. A pesar deste gran avance, Álvarez alertou de que "van aparecer novas resistencias, porque o verdadeiro reto é desafiar e desmantelar as estruturas de poder dos homes".
Ao longo da súa intervención, a portavoz do Grupo Parlamentario Socialista na Comisión de Igualdade do Congreso recordou que "o 75% das mulleres que renunciaron ao procedemento de denuncia non tiñan ingresos ou eran ínfimos" e que, nos casos nos que non hai orde de protección, "a posibilidade de retirar a denuncia multiplícase por 3,6", un dato que pode resultar preocupante ao pensar que "hai xulgados que non a conceden no 90% dos casos".
A mañá continuou cunha mesa redonda de análise desde o ámbito xurídico e social na que participaron Inmaculada Montalbán Hortas, maxistrada do Tribunal Superior de Xustiza de Andalucía, e Marisa Soleto Ávila, directora da Fundación Mulleres. Montalbán centrou a súa intervención en reflexións da súa actividade como xuíza e na necesidade de incorporar certas cuestións relacionadas coa formación á carreira xudicial. Ademais, reivindicou que só se pode "afrontar a violencia contra as mulleres como se afrontan as cuestións de dereitos humanos, creando políticas múltiples dirixidas á igualdade de oportunidades".
Doutra banda, recordou o arraigados que están os prexuízos na sociedade actual, como demostra unha enquisa publicada esta semana na que saíu a relucir que "o 28% dos homes cre que as violencias sobre as mulleres esaxéranse e aínda se cre que hai un estereotipo de vítima".
Nesta mesa, Marisa Sotelo asegurou que o pacto inclúe "un gran paquete de modificacións lexislativas que xa deberían estar aprobadas e non é así". Máis detalladamente, a directora da Fundación Mulleres recordou a situación dos menores, das familias das vítimas, as propias sentenzas xudiciais, cuestións de tutela aprazadas durante anos ou maltratadores que non deixan que os seus fillos reciban tratamento psicolóxico.
A xornada continuou pola tarde cun taller a cargo da maxistrada do Tribunal Superior de Xustiza de Canarias Gloria Poyatos; outro de man de Yolanda García, experta en Comunicación e Xénero, e un terceiro impartido por Rosana Izquierdo, médica de Atención Primaria. Finalmente, a clausura estivo a cargo de María Paz Filgueira, maxistrada do Xulgado de Violencia sobre a Muller número 1 de Vigo.