Axentes da Policía Local de Poio investigan a estafa que sufriu unha muller, á que subtraeron 12.000 euros en efectivo e xoias cun valor que, segundo as estimacións iniciais, superan os 40.000 euros.
A vítima atopábase na rúa cando foi interceptada por unha muller, duns 35 anos, que lle explicou que contaba cuns boletos de lotería premiados e que precisaba saber onde había unha administración para poder cobrar o suposto premio.
Nese momento entrou en escena o segundo estafador, que, simulando sumarse á conversación de xeito casual, afirmou que coñecía a un vendedor de lotería.
A descoñecida afirmou que estaría disposta a compartir a contía con el e coa vítima do engano, a condición de que achegasen cada un 15.000 euros para, presuntamente, doar ao arranxo do campanario dunha igrexa.
Segundo os investigadores, apareceu entón no lugar unha terceira persoa, conducindo un turismo de cor granate, no que os estafadores trasladaron á muller a tres sucursais bancarias, dúas en Pontevedra e outra en Poio, nas que a vítima efectuou varias retiradas de diñeiro, por valor de máis de 12.000 euros.
Ademais, tamén a convenceron para que lles fixese entrega doutros 700 euros en metálico dos que dispuña na súa vivenda e xoias por valor de 40.000 euros antes de iniciar o traxecto.
O final da estafa chegou cando lle entregaron unhas moedas á muller para que comprase unha bebida nun establecemento hostaleiro, ante unha suposta indisposición dun dos seus acompañantes e, cando a muller se baixou do coche, os descoñecidos déronse á fuga.
O modus operandi empregado por estes individuos fai sospeitar á Policía Local de que se tratan de profesionais da estafa, polo que recomendan á cidadanía que extremen as súas precaucións.
