A patrulla Fiscal e de Fronteiras de Marín e a patrulla do posto de Pontevedra detiveron na madrugada deste venres en Poio dous homes aos que sorprenderon metendo unha moto roubada dentro dunha furgoneta. Tamén subtraeran un GPS, ademais doutros obxectos que tamén se sospeita que non son da súa propiedade.
A Garda Civil recibiu na mañá deste venres sendas denuncias polo roubo dunha moto nun garaxe en San Salvador e dun GPS, que resultaron ser os recuperados tras a detención dos dous individuos, un home de 30 anos de nacionalidade romanesa e con domicilio en Ponteareas e un home español de 42 anos con domicilio en Pontevedra.
A detención produciuse ás 2.45 horas da madrugada. Os presuntos ladróns permanecen na Comandancia de Pontevedra e pasarán a disposición xudicial nas próximas horas.
