A Patrulleira Curvo Mariño, pertencente ao Servizo Marítimo da Garda Civil de Pontevedra, recuperou este venres pola tarde no centro da ría un aparello ilegal de pesca fondeado á altura da illa de Tambo.
Tal e como expuxeron os responsables da Benemérita trátase dun trasmallo, constituído por tres panos no que, unha vez lanzado, se enmalla todo tipo de peixes sen discriminar especies nin tamaños e saltándose todas as normas vixentes para as embarcacións de baixura que faenan na ría.
O apeiro, do que non se deu co dono, foi izado pola tripulación e entregado ás autoridades competentes da Consellería do Mar.