O Goberno local e o PSOE denuncian a falta de médico no municipio de Cerdedo

As horas sindicais do titular da praza do centro médico de Cerdedo foron detonante dunha queixa presentada polo alcalde, Jorge Cubela, ante o Sergas e da petición do PSOE de Cerdedo-Cotobade de que a súa agrupación parlamentaria aborde a situación da PAC cercedés, onde varias ausencias do facultativo ocasionaron repetidas situacións de queixa por parte da veciñanza.

O rexedor, Jorge Cubela, explicou este xoves que se dirixiu ao Sergas para queixarse pola pouca eficacia da coordinación da área, responsable en última instancia da situación, que, ao parecer xérase cada vez que o médico deste centro debe collerse un día para atender ás súas obrigacións, causa baixa puntual ou fai uso, como nesta ocasión, das horas sindicais. O episodio máis recente, no que nin se cancelou a axenda, nin se enviou a outro galeno, acabou cunha consulta chea de ata 25 pacientes citados aos que ninguén avisara e que tiveron que elixir entre volver ás súas casas e pedir cita outro día ou desprazarse ao centro de saúde máis próximo (Carballedo ou Tenorio).

"A esa improvisación haille que pór remedio inmediato porque os que saen perxudicados son os cidadáns, alleos a calquera responsabilidade sobre este tema", sinalou Jorge Cubela, quen manifestou aos responsables do Sergas "a necesidade de habilitar mecanismos que garantan a atención médica aos veciños e veciñas de Cerdedo que ven inmersos nunha situación incómoda e moitas veces sobrevida e que impiden que teñan unha atención sanitaria eficiente como corresponde". 

A situación tamén motivou queixas dos veciños aos responsables do PSOE local. "Os pacientes non son atendidos das súas doenzas, a pesares de ter concertada cita non propio Centro de Saúde . Esta situación está a ocorrer de forma periódica", afirma o equipo liderado por Lina Garrido, que se propón que o asunto sexa abordado no Parlamento Galego, como fixo antes coa situación da sala de espera do consultorio de Carballedo.

O PSOE sinalou en diversas ocasións que os recortes nos servizos sanitarios parecen ser a única vía do executivo autonómico para rendibilizar a fusión dos dous concellos, hai catro anos. Entre outros asuntos puxo o acento na desaparición da Pediatría de Cerdedo e Carballedo, a ausencia de ambulancia na PAC ou a redución das horas de matrona no municipio. No Pleno do martes, unha moción socialista proporá que se pida ao Sergas recuperar os postos amortizados e cubrir as baixas.