Un incendio arrasa os instrumentos dos Solfamidas e dá un duro golpe á comparsa

O novo ano empezou en Campo Lameiro cun suceso que deixa ferida de morte a unha das comparsas máis emblemáticas da comarca de Pontevedra. Un incendio declarado no pavillón de Campo Lameiro, onde Os Solfamidas adoitan gardar boa parte do seu material, deixou practicamente inservibles máis de 30 instrumentos, a maioría deles de percusión, ademais dalgúns dos deseños que os integrantes da histórica asociación xa estaban a preparar para o próximo Entroido.

O sucedido deixa agora no aire a participación no Entroido do colectivo, composto por 80 integrantes. Segundo explicou o presidente da comparsa, Ángel Rodríguez, Lito, o lume puido haberse orixinado por un fallo eléctrico nunha das lámpadas do belén ornamental co que se decoraron as instalacións con motivo do Nadal. "Había moita madeira e material inflamable, seguramente todo se queimou moi rápido", observou Rodríguez.

A comparsa recibiu decenas de mensaxes de apoio nas redes sociais. Lito Rodríguez agradeceu as mostras de agarimo

Aínda que as chamas non chegaron a queimar directamente os instrumentos musicais, as altas temperaturas fixeron que "practicamente acabasen derretidos". Bombos, caixas de resonancia e outros materiais botáronse a perder por completo. "Hai material que pode custar máis de 1.200 euros, non é unha cantidade que se poida asumir facilmente", lamenta Lito Rodríguez, que sinala que Os Solfamidas conta na actualidade con 19 percusionistas. "Parte dos disfraces nos que estamos a traballar témolos gardados noutro lugar, pero, agora mesmo, coas perdas que tivemos, hoxe (por este domingo) vexo moi difícil, por non dicir inviable, que podamos participar no Entroido", aseverou o máximo responsable da comparsa, que hoxe manterá unha reunión co resto dos seus compañeiros para analizar a situación. sen apenas marxe.

Ademais da cuestión económica, outro dos problemas aos que se enfronta a agrupación de Campo Lameiro é a falta de tempo para poder sobreporse ás perdas. "Resultaría moi complicado que algúns dos instrumentos chegásennos a tempo para o Entroido. Habería que encargalos inmediatamente, pero somos unha comparsa modesta, non dispomos de axudas económicas e non todo o mundo pode facer fronte a custos tan elevados", asevera o seu presidente. A voz de alarma deuse ás 9.00 horas, cando uns veciños se dirixían a misa e viron que saía fume do interior do pavillón polideportivo.