Un incendio orixinado no interior dunha nave industrial de chatarra, en Poio, calcinou diverso material, aínda que, por fortuna, non houbo que lamentar danos persoais.
Foron varios os particulares que, a poucos minutos das 3.00 horas deste venres, chamaron ao 112 Galicia para informar os feitos. Alertaban de que saía fume e lume do interior dunha nave de chatarra, situada na Avenida Peirao Bicada, en Lourido.
Desde o 112 notificouse o incendio aos Bombeiros de Ribadumia, ao GES de Sanxenxo, a Protección Civil de Poio, á Garda Civil e, como medida preventiva, aos servizos sanitarios. Ademais, tamén se desprazaron, ata o lugar, dotacións de Bombeiros dos parques de Pontevedra e do Morrazo xunto con medios forestais, para brindar apoio nas tarefas de sofocación das chamas.
Unha vez finalizada a intervención, os servizos de urxencias confirmáronlle aos operadores do 112 que ardeu chatarra e diverso material acumulado dentro da edificación. Por fortuna, non houbo que lamentar danos persoais.