Primeiro peche puntual do outono no Paseo Cordo Boullosa de Ponte Caldelas logo das fortes choivas rexistradas nas xornadas do venres e o sábado.
O alcalde, Andrés Díaz, informaba a media mañá da situación do río, que padeceu unha das súas xa tradicionais avenidas de auga que deixou anegada, principalmente, a zona próxima á praia fluvial de A Calzada, pero que foi invadindo a vía ata a zona próxima á ponte a medida que pasaba o tempo. Pola tarde o viario foi reaberto, segundo indicou o Goberno local, pero con especial atención á súa situación por se as choivas continuaban.
Nesta ocasión non foi necesario retirar coches da bolsa de estacionamento existente entre a zona da ponte e o inicio do paseo, aínda que a incidencia foi das máis destacadas dunha xornada na que a choiva ocasionou danos en distintos puntos da comarca.
Tamén en Poio foron necesarias algunhas intervencións segundo indicou a Policía Local, que centrou a súa actividade en dar resposta a distintas incidencias.
Unha das máis ameazantes para a seguridade dos condutores foron as bolsas de auga detectadas no viario que une a zona do porto deCampelo co aparcadoiro de Lourido, onde se eliminaron varios destes puntos de acumulación de auga.
En Combarro foi necesario actuar pola entrada de auga na nave de piragüismo ao subir a marea e tamén se lles requiriu pola auga acumulada no Pavillón de Deportes. Na zona de San Xoán, ademais, houbo que actuar ante o atasco de varias arquetas. O Concello mantivo a dúas brigadas operativas durante toda a xornada para poder dar resposta ás incidencias que se foron sucedendo.
