Axentes da Garda Civil incautaron este xoves un cargamento de 1.740 quilos de ameixa ilegal no interior dunha furgoneta que foi interceptada na peaxe da AP-9 de Vilaboa. O instituto armado ordenou que o vehículo, que tiña placas de matrícula portuguesa, se detivese ao apreciar que viaxaba con evidentes signos de exceso de peso.
Ao inspeccionar o vehículo, os axentes comprobaron que levaba unha importante cantidade de sacos de ameixa xapónica e que o condutor da furgoneta non cumpría cos requisitos regulamentarios.
As irregularidades detectadas na documentación levaron á Garda Civil a incautar a furgoneta e a mercancía que transportaba, que quedaron custodiadas polo servizo de Gardacostas da Xunta.
O condutor da furgoneta enfrontarase a un expediente sancionador incoado pola Administración autonómica como presunto responsable de sendas infraccións á Lei de Pesca de Galicia e ao regulamento da Lei de Ordenación dos Transportes Terrestres.