Os veciños da Lama gozaron este domingo da primeira edición do mercado tradicional de proximidade Emrede, que se celebrou na Alameda con varios postos de produtos ecolóxicos, produción agrícola da comarca, artesanía e con actuacións e intervencións artísticas de factura local.
A pesar do mal tempo, a colocación dunha carpa no centro da vila e as treguas concedidas polos nuboeiros deste domingo permitiron que a feira se convertese nun éxito similar ao cultivado noutros puntos da comarca en datas recentes.
Os asistentes puideron gozar de pan artesanal, instrumentos musicais feitos a man, adquirir mel da comarca, embutidos, sobremesas, produtos da horta ou incluso, pemento recentemente moído cun dos sistemas utilizados nas décadas dos 70 e 80.
A artesanía é unha das actividades favoritas dos lameses, como quedou acreditado coas mostras de cestería ou palillado realizadas polas veciñas desta localidade. Outra das disciplinas artesás de factura local foi a elaboración de tipis indios e atrapasoños, unha nota exótica nun percorrido no que non faltou de nada, nin sequera para os máis pequenos. Ademais, estiveron presentes outras veciñas da zona, como a terapeuta holística Leonor, ou Cristina Verenne, artesá e agricultora que impartiu un taller de fabricación de las afieltradas.
As instalacións contaron cunha carpa con xogos e actividades para nenos todo o día así como unha obra de teatro infantil, As Aventuras de Paio. Pola tarde tomaron a substitución os talleres de construción de tipis.
Na parte musical, a formación Os Catro Ventos e o grupo Willi Kings encargáronse de animar o recinto, no que, ademais, celebráronse varias degustacións e demostracións gastronómicas.