A Garda Civil localizou varios artefactos pirotécnicos no peirao de Combarro que poderían estar deseñados co obxectivo de espantar os golfiños, para que non interfiran nos labores de pesca. Foi un axente do servizo marítimo que estaba fóra de servizo quen realizou o achado. Segundo informa a Benemérita, viu a uns nenos manipulando unha caixa de cartón abandonada xunto a un colector de lixo no peirao pesqueiro, achegouse e viu que no seu interior había cinco artefactos pirotécnicos, todos eles das mesmas características externas.
Solicitou a intervención dos técnicos especialistas en desactivación de explosivos (Tedax), que determinaron que os artefactos foran modificados engadíndolles unha pedra, que estaba encostada ao petardo con cinta illante, a modo de contrapeso. As primeiras valoracións apuntan á posibilidade de que este tipo de utensilios poidan ser utilizados de forma ilegal para evitar que determinadas especies, como os golfiños, cuxa presencia parece ter crecido nas últimas datas, interfiran nos labores pesqueiros ou produzan danos nos aparellos.
A Garda Civil, que xa iniciou a correspondente investigación para esclarecer as circunstancias do achado e o uso destes artefactos, recorda que o uso dos explosivos nos labores de pesca, que poden causar danos indiscriminados en todo o medio mariño, está tipificado como delito no Código Penal.
