Un marinense vive unha verdadeira odisea para volver de Madrid en tren

Saúl Paz non se imaxinaba a odisea que pasaría para regresar á súa casa o luns logo de terse que ir o pasado venres a Madrid por unha consulta médica. E é que un traxecto en tren, con saída na capital e con destino Pontevedra, que non adoita exceder das catro horas e media durou preto de doce.

A presenza da neve e as baixas temperaturas que xerou a borrasca Filomena ocasionou un mal funcionamento nas vías durante o traxecto que estaba a realizar Saúl. Isto provocou que o tren tivese que deterse entre a poboación de Poboa de Sanabria e A Gudiña mentres procedían á desconxelación dos rodais do tren, xa que "non se puido realizar con normalidade o cambio de ancho de vía que leva a cabo o cambiador instalado en Pedralba de la Pradería, en Zamora", aseguran fontes de Renfe. A espera alargouse preto de seis horas.

Foi neste momento cando chegou a crispación do marinense, que asegurou que durante a espera non se cumpriron coas medidas hixiénicas establecidas con motivo da pandemia en ningún momento. "Os nove vagóns ían a lume de biqueira e mentres estabamos parados a xente andaba dun lado para outro e alí non se cumprían os protocolos de seguridade", explica o marinense, que indicou que desde a compañía tampouco se lles ofreceron novas máscaras hixiénicas para substituír as que levaban os pasaxeiros. "Pasámonos doce horas nun tren coa mesma máscara, cando moita xente só podía estar catro seguindo as recomendacións sanitarias", anota.

Con respecto ao aforamento, Renfe indicou que no momento no que se produciu a incidencia había 109 pasaxeiros no tren, o que supón un 41% de ocupación.

O afectado tamén denunciou que, ao estar a cafetería do tren pechada e atoparse este parado no medio das vías e non nunha estación, os pasaxeiros non tiñan posibilidade de adquirir alimentos e bebidas. "Si que é certo que ao principio nos deron unha botella de auga para cada un, pero non chegaron para todos", indica.

Saúl Paz tamén explicou que os dous trens que fixeron con anterioridade a mesma ruta tiveron o mesmo problema, sen que a compañía puxese medios para solucionar a incidencia nin se suspendese a viaxe ante a imposibilidade de cumprir un servizo de calidade.

O marinense xa presentou unha reclamación na que solicita a devolución do importe do billete, así como que se adopten medidas de seguridade fronte ao coronavirus nos desprazamentos. Fontes de Renfe "lamentaron as molestias orixinadas aos viaxeiros", aos que se lles devolverá o importe íntegro do billete.